Eerste actie: Leudal
Gesjreve in ’t Wèssems
Oos ieëste actie is ein feit. PLAT haet op versjillendje plaatse in de gemeindje Leudal de kómborde alvast vuuerzeen van de Limburgse benaming. Mèt dees actie wille wae de gemeindjes aanzètte óm de Limburgse taal op te numme in häör beleid. Óm ’t Limburgs te normalisere mót ’t in alle laoge van de samelaeving zichtbaar zeen.
Tweede actie: Bung
Gesjreve in ’t Mestreechs
Veur eus twiede actie höbbe veer de plaotsnaomborde in Bun beplak. Hei waore al e paar borde veurzien vaan de Limbörgse naom, veer wouwe evels tot ’t setsje compleet zouw weure. Veer höbbe ouch e gedeilte vaan de borde op de statie gedoon, mer v’r woorte oonderbroke… Weurt dus nog vervolg.
Derde actie: ’t Gouvernemènt
Gesjreve in ’t Plat!
Waat is loos?
Provinciaal Staote Limburg vergadere 13 december 2024 uuever ’t paad det ze wille numme vuuer de toekómst van ’t Limburgs. Mèt ós spandook wille wae nog ins benaodrökke wie belangriek ’t Limburgs vuuer ós is. Wae es PLAT! zeen vuuerstenjer van ’t plan óm in 2030 Deil-III-erkènning ónger ’t Europees Handjvest aan te vraoge. Det beteikentj neteurlik neet det de politiek noe stil mót gaon zitte toet den. Ouch ónger Deil-II kan nog väöl gebuuere en wae, en óngetwiefeltj de Limburgse taalorganisaties, zulle ’t allemaol dus ouch sjerp in de gate haoje. Neet allein de provincies, mer ouch de gemeintes mótte hun verantjwoeardelikheid numme mèt ’t introducere van serieus taalbeleid. Mèt ós acties zulle we druk blieve oetoefene óm ’t Limburgs ech de positie te gaeve die ’t verdeentj.
Veerde actie: Hôrs aan de Maas
Gesjreve in ’t Plat!
De eerste actie in Naord-Limburg
In fibberwarie 2025 höbbe veer oos veerde actie oetgeveurd. Veer wille ós netuurlik richte op alle heuk van oos provincie, dus zeen v’r deze keer in ’t naorde gewaes, gemeinte Hôrs aan de Maas.
’t Is qua landjoppervlaak ’n grote gemeinte, dus ’t waar nogal ’n operatie. Mit hulp van eine oet de gemeinte zelf höbbe v’r ’n route gemaak en höbbe bie de meiste dörpe twee plaatsnaamborde beplek mit de Limburgstalige variant in de lokaal sjpelling.
Aan ’t begin van mei waerde ós aevel bekind gemaak det oos toeveuginge aan de borde in Hôrs gedeiltelik, of gans, weggehaold ware. Omroop Hôrs aan de Maas haet vervolges verhaol gehaold bie de gemeinte. Dao kwaam ’t volgende oet veurt:
“De gemeente is op de hoogte van de aangebrachte stickers op diverse plaatsnaamborden en zal deze verwijderen. Daarnaast gaan wij Actiegroep PLAT! benaderen om duidelijk te maken dat het opnieuw aanbrengen van stickers niet gewenst is. Indien de stickers opnieuw worden aangebracht, behoudt de gemeente zich het recht voor om de verwijderingskosten op de actiegroep te verhalen en waar nodig handhavende maatregelen te treffen.”
Ook op de vraag of tweetalige plaatsnaamborden in de toekomst een optie zijn, is de gemeente helder: “De gemeente is op dit moment niet voornemens om dit permanent in te voeren. Hoewel wij begrijpen dat er inwoners zijn die meer aandacht willen voor het Limburgse dialect, steunen wij deze vorm van actievoeren niet. Er zijn andere, constructieve manieren om dit onderwerp met de gemeente te bespreken, en daar staan wij altijd voor open.”
Hie-op höbbe veer per e-mail einen officiële waarsjoewingsbreef gekrege van de gemeinte Hôrs aan de Maas.
Veer vónje de lèste zin oet ’t artikel waal interessant: ‘‘Er zijn andere, constructieve manieren om dit onderwerp met de gemeente te bespreken, en daar staan wij altijd voor open.’’ Dao gaon veer netuurlik gaer op in. ’t Doel van zó’n actie blief óm de discussie róndjóm ’t gebroek van ’t Limburgs aan te wakkere. En es veer ein gemeinte drek aan kinne sjpraeke is det al helemaol top. Daoróm geit PLAT! op 25 juni in gesjprek mit wèthajer Coenders van cultuur van gemeinte Hôrs aan de Maas.
Viefde actie: Venraoj
Geschreve in ’t Venloos
Veur actie nömmer vief hebbe weej borde in de gemeinte Venraoj beplek. Dao kwame wie altied weer vuuel reacties op. Weej blieve de discussie aanjage! Laot Limburgs net zoeë normaal zien as ’t Nederlands det is
