Gedachtegood

Gesjreve in 't Remunjs

Waem zeen veer?

PLAT is opgerich door twee jónges oet Nederlans-Limburg die beide väöl passie veur 't Limburgs höbbe. 't Is eine actiegroep dae zich sjterk maak veur de bevórdering van de Limburgse taal. Veer wille ós dus laote zeen door middel van acties. Neet allein mer d'reuver zitte klage det 't plat verdwient, mer juus de waereld ingaon en d'r get aan doon. Daad bie 't waord voge en 't ein grótter deil make van 't dageliks laeve. 't Zichbaarder make, mer ouch det se 't dökser geis heure.

Woróm doon veer waat veer doon?

Veer wille 't Limburgs laevendig haje. In alle laoge van de samelaeving. Jónk en aad, erm en riek, gesjreve en gesjpraoke, thoes mer ouch zeker daoboete. Limburgs is de taal van ós. De taal van gezelligheid, vrundjsjap en verbinjing. De taal van 't hert.

Mer 't is väöl meer es allein 'n taal. 't Is ouch deil van oos cultuur, van waem veer zeen, van oos identiteit. Mit tösse de 1,2 en 1,5 meljoen sjpraekers verdeild euver Belsj- en Nederlands-Limburg. De taal is enórm riek in zien eige klanke, wäörd en netuurlik variëteite. 't Zól doodzuunj zeen es v'r 't plat zólle laote oetsjterve. 't Limburgs is d'r en moog d'r ouch zeen!

Waat is oos doel?

Veer wille daoróm det 't Limburgs de erkinning krieg det 't verdeent. Oos acties höbbe es doel det 't Limburgs door 't Riek erkind geit waere ónger Deil III van 't Handjves van Regionale Tale. Det wurt noe al erkind ónger Deil II van 't Handjves, waat inhilt det de euverheid zich al heel bewös is det 't 'n apaarte taal is en neet ein aaftakking van 't Hollands. Allein wille veer det mit Deil III det 't plat wurt erkind es riekstaal en eindelik ins cóncrete meugelikheje kómme en acties genaome kinne waere veur de óngersjteuning van de taal. Wie 't gebroek in de rechbank en in sjole.