Limburgs is gein dialek

Gesjreve in ’t Thoears

Limburgs is gein dialek

Dit klinktj misjien vraemdj. Väöl minse en de media zègke regelmaotig: ’t Limburgs dialek. Taalkundig is d’r dèks weinig versjil tösse ein taal en ein dialek. Zoea weurtj waal ins gezag: Ein taal is ein dialek mèt ein leger en eine vloeat. ’t Versjil haet te make mèt polletiek, status en perceptie van de Limburgse taal. ’t Woeard dialek impliceertj det ’t Limburgs óngergesjiktj is aan ’t Hollands. Limburgs is sinds 1997 door ’t Riek erkintj es ein ‘regionaal taal’. Wiewaal ’t neet dezelfdje status haet es ’t Nederlands, Fries en Papiaments is Limburgs dus waal degelik ein taal.

De Limburgse taal bestuit neet

Ein begriepelike reactie hie-op is: De Limburgse taal bestuit neet, ’t zeen allemaol versjillendje dialekte. ’t Is inderdaad waor det ’t Fries en Nederlands gestandaardiseerdje vorme höbbe en dit is den ouch oze standaard vuuer ein taal. Echter zeen dees tale zeker neet homogeen. De Frieze höbbe ouch dialekte zoeawie ’t Limburgs en häör standaardtaal is kunstmatig gemaaktj. Ouch ’t Nederlands haet zeer väöl versjille.

Óndanks det d’r versjille zeen kinne alle Limburgse dialekte elkaar perfekt verstaon. Bie ’t gesjreve Limburgs is dit neet anges en mèt de 2003 Spelling van de Limburgse Dialecten weurtj ’t steeds mekkeliker óm ós te begriepe. Dees variatie is waat ’t Limburgs uniek maaktj en neet minder gesjiktj vuuer de titel taal.

Moog dialek den noeatj gebroektj waere?

Jewaal, de variaties bènne de Limburgse taal kinne besjreve waere es dialekte. Dink hiebie bevuuerbeeldj aan ’t Wieërts dialek, det is ein óngerdeil van de Limburgse taal. Dinger es ‘mien dialek’ kinne neteurlik ouch. In Mestreech neume ze häör dialek dèks de ‘Mestreechter taol’. Hie is absoluut niks mis mèt. ’t Leutj zeen det de Sjenge hieël gruuets zeen op ’t Mestreechs en det kinne we allein mer aanmeudige veur de ganse provincie!

Ouch gruuets op de Limburgse taal? Help oos boeadsjap verspreie door middel van oos stickers!